GYI LASANG LA

Ngai Agyi Lasang La re. Asak (59) rai ni ai. Nye gainu jan gaw Ndau Kaw re. Kasha (7) lu ga ai. Shawng de Sammung e nga ga ai. Waingmaw Ginwang de bu htawt wa ai re.

Sammung e, Myutsaw Shanglawt Army Hpyenla (10) ning jan galaw lai wa sai. Hkumdek masat A. 11854 re. Ndai ga de du nna, annu wa ni yi sun hkauna galaw sha nga yang, majan kalang bai byin wa maw ai majaw, Mungshawa Hpyenla bai galaw ra mat nngai.

Ya ngai ndai zawn hkumhkrang hta ra rawng gawngkya mat ai gaw, 2011, October (13) ya shani, Lung Zep Kawng gasat poi hta Myen asuya hpyen ni gap bun ai; (Chemical) Lashi pala bom nsa a majaw re. Anhte Lung Zep Kawng sin ai dap kung gaw, Bansau Kung (5) ni rai ga ai. Anhte a Shawnglam hpa-awn gaw, Du Kaba Maran La Tsaw wa re. Myen hpyen hpung ni gaw marai hkyingmi daram rai ma ai. Anhte gaw marai (180) sha re.

Shanhte a Katsu hpyen dap kaw na (120mm) hte aging gap bun mi ai. Hpyenla law law mung si hkam ma ai. Dai shani sinat kaji kaba gap bun ai hta (Chemical) lashi gung pala mung gap bun ma ai. Nye a lalam (4) daram kaw sha wa hkrat ai re. Nye manang wa gaw bom wanhkut garai n bra yang, lu hprawng mat ai. Ngai wanhkut achyang ni marawp hkrup kau ai. Nye a hkumhkrang lagaw lata hkan, wan hkru hkang nma kaba ni kap mat ai. Ngai garai n malap mat yang, dai lashi pala myawksi baw gaw magri re hpe mu kau dat nngai. 

Hkringmi na lapran ngai baw sin wa ai; Myiman ting kang kahtet wa ai; madawn wa ai. Loi mi grau na wa ai shaloi, na lahpang wa ai; mayu yuhkrawng kahtet machyi wa ai; Myi n mu mat ai hte kan chyabung hkintit wa ai. Wa ni machyi wa ai. Sinda ting manat ginjup kau ya ai zawn nga wa ai hpang, ngai malap mat nngai.

Alenbum hpyendap tsirung, Woichyai Mungshawa tsirung, Mangshi tsirung ni rawng sai. Bumtsi ni mari lu ai. Ya du hkra lam n lu hkawm ai. Dung ai kaw na ngai hkrai n lu rawt ai; gari gawa rai nngai. Sumru n mai ai. Majan poi na lam ni bai nhtang sumru jang baw grai machyi wa ai. Ya du hkra ga yet sha mai shaga mat ai. Yup n pyaw ai. Ya du hkra myiman grai naw kahtet kang ai majaw, shani shana nye a gainu jan kum gyin galep la nna ayan kaba ya nga ai. Shaloi loimi nga pyaw ai. Sinda ndai manat ginjup da ai zawn nga hkamsha yak la ai majaw, asak 5-6 ning matut nga lu na zawn n ngu mat ni ai. Ndai zawn byin ai laning mi shata 4 rai sai. Ma ni Miwa ga hkan gunjang jang nna, ngai Kawa hpe tsi lajang bau maka da mi ai. Annu wa ni Woi Chyai Hpyen-yen dabang e nga ga ai. Ya du hkra asak hkrung lu ai gaw, Karai Kasang a chyeju san san sha re law. Ngai ndai zawn byin mat nna, Shawnglam de n lu sa mat ai majaw, maroi nni masin nsi la nngai.

Shanglawt Tsing

fbook youtube fliker