DU KABA SUMLUT GUN MAW HPANG DE SHAGUN LAIKA

 

Tsawra hkungga ai Du Kaba hpang de,

Ndai laika hte hkrum shaga dat lu nngai. Du Kaba ngwi pyaw hkam kaja let myit mang hkawm sa, galaw sa wa ai lam ni yawng awng dang lu u ga ngu akyu hpyi garum ya nngai.

Du Kaba hte Magam gun ni yawng hpe America mungdan kawn kabu gara hkap tau hkalum la ga ai. Ya na zawn Wunpawng Mungdan Shanglawt Asuya magam gun ni kawn America mungdan de du hkra lahkam sa wa ai hpe mu chye lu ai majaw myit n gun mung grai lu ai. Matut nna Du Kaba hte Magam gun ni yawng a ntsa hpang Madu Karai Kasang shaman ya nna galaw sa wa ai magam lam ni yawng awng dang la lu u ga akyu hpyi ya nga na nngai.

Du Kaba America de sa na re nga shiga na chye ai kaw na grai kabu n gun lu lai wa ai. Anhte Wunpawng Myusha ni a Ningbaw kaba langai America ga de sa ai gaw US Asuya hte mung masa lam sa hkrum jahta ai sha n-ga, America mungdan kaw nga ai Myusha ni hpe sa du jahkrum, n-gun sa jaw ai lam mung rai na re ngu kam ai. DC kaw Du Kaba hte Myusha ni hkrum zup hpawng galaw na re nga na ai majaw, DC de sa na matu mung dawdan lai wa kau sai. Raitim, shiga bai na lu ai gaw, shaga da ai ni sha mai sa ai lam bai na chye lu ai. Sa du lawm na ni hpe mying jahpan hte hkrak masha masat nna shaga ai re lam na chye lu ai majaw grai myit n pyaw let, Du Kaba hte sa du hkrum na masing hpe bai dawm kau nngai.

Ndai zawn zuphpang lawm na masha jahpan hte hkrak galaw ai gaw Du Kaba ni a shimlam a matu rai na re hpe mung chye na ai. Raitim, shiga bai na lu ai gaw, hpunau Hkang Myusha ni law law wa Du Kaba hte hkrum shaga na re lam bai na chye lu ai majaw, ngai hta hkam sha wa ai lam gaw, anhte Myusha ni a Ningbaw Ningla hpe laga myusha ni law law pi sa lu jahkrum ai rai yang, anhte Myusha ni gaw hpa majaw n mai sa jahkrum ai kun ngu bai myit wa ai. Anhte tsawra kam hpa ai, Wunpawng Myusha ni a dawhpum dawnu kaba tai let woi awn nga ai Wunpawng Myusha ni a Ningbaw Kaba hpe anhte Wunpawng Myusha ni gaw hpa majaw n mai hkrum ai kun? Hpa majaw masat da ai ni sha mai hkrum ai kun ngu myit n pyaw hkam sha ai lam ni byin pru wa ai. Hpa n chye n kaw mi rai tim, kalang marang sha lu du ai, Myusha ni a Ningbaw Ningla hpe anhte Myusha ni mung hkrum mayu, mu mayu, shaga mayu ai lam gaw teng sha re.

Ndai zawn byin ai lam ni gaw Du Kaba a mahkyen ni gaw nrai na re kam ai. Du Kaba hku nna gaw tinang a Mysuha ni yawng hpe hkrum mayu, n-gun jaw mayu na re ngu kam ai. Ndai zawn byin ai lam ni gaw Du Kaba du yang sha nrai nga ai, laga ahkyak ai ningbaw ni du shagu, galoi mung mu hkrum ai ni sha hkrum na ahkaw ahkang, mu na ahkaw ahkang lu ma ai.

Myusha lam yan hta grai myit rawt nna, tatut hta mung grai shakut nga ai Malaysia na manang langai hte hkrum shaga ai shaloi, Shi mung Du Kaba America de du na nga lam na chye ai majaw grai kabu n-gun lu taw ai hpe mu mada ai. Shi hku nna ngai hpe san wa ai lam nga ai.

Du Kaba Gun America du taw ai Nang gaw nsa jahkrum ai i? nga san wa ai. Ngai mung, sa na gaw myit lai wa ai, rai tim ya gaw n lu sa mat sai ngu tsun dat ai. Shi bai tsun ai gaw, taw hpa na nsa na ma sa jahkrum u nga tsun ai. Ngai mung, Du Kaba hte hkrum zup na matu mying jahpan hte hkrak, masha jahpan masat nna shaga ai rai ma ai ngu dat yang, shi kawn, Nang hpe gaw n shaga ai i taw nga bai sa san wa ai. Ngai mugn n shaga ai ngu dat yang shi bai gahtap tsun wa ai gaw, mana re gaw, kadai lajang ai ma? (---) hpung ni i? nga san nna, dai ni mung Malaysia na KRC ni zawn rai wa sai i nga tsun wa ai. (hpa hpe tsun mayu ai gaw Shi she grau chye na re.)

Tsun mayu ai lam gaw, tinang a Ningbaw Ningla re majaw, Myusha ni yawng mai hkrum na re, mai mu na re ngu myit la ai majaw rai nga ai. Hkyen lajang ai ni kawn Du Kaba ni hte Mysha ni yawng mai hkrum ai mi nga tim, kadai mung gade a kan bau bungli hte re sha n-ga, hkawm sa hkawm wa hkrun lam mung tsan ai majaw yawng sa du hkrum nag aw yak na re, yawng gaw n lu sa jahkrum na re. Raitim, hkrum mayu ai Myusha ni hpe sha gaw lamang mahkyen lang ai ni kawn sadu hkrum lu na ahkang jaw yang gaw Myusha ni yawng mung grai myitdik myitpyaw ai lam lu na re ngu kam ai. Ya gaw masha masat nna mying hte hkrak shaga ai re majaw, laga Myusha lam hta myitsu myitrawt taw ai Myusha ni a matu myit n pyaw hpa byin wa ai. Masha masat nna shaga ai lam hpe mung mara mu ai gaw nre, Myusha lam yan hta tatut shanglawm shakut taw nna, grau grau tangdu hkra lu galaw ai ni re majaw rai na re ngu kam ai.

Du Kaba hpe garum hpyi mayu ai lam gaw, hpang na lang gara Myusha Ningbaw Ningla ni mi rai rai, Gara mungdan de mi du ai rai tim, Myusha ni law law hte hkrum zup mai hkra lajang ya rit ngu kam hpa let garum hpyi nngai. Dai hku Myusha ni law law hte hkrum zup ai rai yang she Myusha ni hpe zinlum la ai, n-gun jaw ai lam tai na re ngu kam ai.

Du Kaba America ga kalang marang sha du ai hpe myitru, myitpu hpa tsun hpaw dan ai gaw nre, Myusha langai hku nna hkam sha ai lam hpe tsun hpaw dan ai lam she re hpe Du Kaba chye na ya rit.

Du Kaba myit ngwi simsa ai hte Myu hte Mungdan a matu grau grau awng dang ai hte shakut sa wa lu u ga, Maigan du Myusha ni hpe mung grau grau zinlum lam woi la lu u ga galoi mung akyu hpyi ya nga nngai.

Wunpawng Mungdan hte Wunpawng Myusha ni hpe Hpan Karai Wa tut bausin shaman chyeju jaw ya u ga.

Myusha lam yan hta,

Slg. Naw Mut
Texas
USA

fbook youtube fliker