CHYINGHKAI WA

Shinggyim mungkan pinra
Chyinghkai hta grau n nga,
Nu a hkritung kata
Sai tum sai pa ten na,
Kyuhpyi n-gun kaba
Wa myit lit li pu ba,
Salum htuk htak kahpra
Kaning rai chyinghkai sa na.

Mungkan pinra du sa
Singgu krin ten kaw na,
Ngai sha bawng-ring hkam ja
Masawp masin hkum hkra,
Tsawra lahku maka
Jit hkyi sanen mya mya,
Yup n hkru zawzang shana
Ten hkying ladaw law la.

Sak prat ladaw ram wa
Prat dep shachyut ra nga,
Hpyen-gang Noi hpye jawng sa
ILK ka lungpa,
Mungkan hpaji sumhpa
Yakhkak lapran lit la,
Sharin jahpat sumhpa
Myi jahpaw shalat ai Wa.

Shinggyim Nammukdara
Prat pra hkaleng latsa,
Lu sha bu hpun nga na
Magup sumhpa zeng hkra,
N sim n sa pu ba
Lahtin salat lwi mya,
Dinghku bungli shaja
Bau maka shalat ai Wa.

Dinghta mungkan Kawa
Maroi nni salum kata,
Madu hta yup pyaw hkring sa
Myit dum shing-ran pra pra,
Kawa masat ninghtoi June hta
Chyeju sumru hti n ma,
Baw gum shagrau hkungga
Chyeju shakawn Karai Wa

Ngai tsaw Chyinghkai Wa a
Hti n ma chyeju dam lada,
Ninggawn Tawa grau hkra
Sin dun sumri myit kaba,
Lamu hta grau tsaw nga
Panglai hta sung dam lada,
Mungkan prat grin dingsa
N htum hkayan lwi nga.

Bumwa Hkri Ma

fbook youtube fliker