MYEN HPYEN DAP A SHINGLA NINGHKAP NI

Myen Hpyen Dap gaw, ahkang aya (power) hpe n ginlut mat hkra, prat dingsa ahkang aya grin nga lu na matu, lam amyu myu hku ningchyan shaw let, masing masa atsawm jahkrat nna, gaw gap da sai re.

2010 ning hta lata poi galaw nna, asuya hkrang galai hpaw wa ai gaw, mungdan kata/shinggan (domestic and international) madi shadaw ai tara shang (legitimacy) asuya hku tsap taw nga lu sai re. Hpyen hkring raw nna, asuya hkrang galai (pseudo-government) la nna, ahkang aya hpe manat jum dingyang rai nga ai re. Shingrai, shanhte a ahkang aya (power) hpe lam yan kaba masum hku nna, jum madat (shingla ninghkap) da ai re.

(i) 2008 Gaw Da Tara (Constitution)
Myen Hpyen Dap gaw, 2008 Gaw Da Tara hpe ahkang aya ngang kang na matu, kaba dik ai (shing n rai) ja dik ai (shing n rai) shim lum dik ai, jahtum na shakum pa (wall) hku nna, tawn da ai re. Tsalam shadang 25% shara la ai hte Mungdan Makawp Maga Dap hte Shim Lam (National Defense and Security Council) hta hpyen du ni law shara la ai lam, aten n tam mungdan ahkang aya hpe mai zing la ai lam ni hte kaga lam yan ni a majaw, Gaw Da Tara gaw, Hpyen Dap hpe pahkam hkam ya ai da chyalu re.

Dai Ga Da Tara hpe tsep kawp hkum hkra (gram ka na), dai hpe hkra sai hte hpyen ahkang aya zing ai lam (military coup) byin wa na re. Bai nna, Ga Da Tara hpe gram sharai na ngu, kade marawn ai rai tim, hpyen dap  hku nna, hpa ahkyak n la ai re. Ga shadawn, lai wa sai shaning hta NLD party hku nna, Gaw Da Tara gram shalai na ta masat (signature) wan manga daram lu gahkyin da lu ai rai tim, hpyen dap kaw nna dai hpe hpa zawn n nawn ya ai re.
Dai majaw, 2008 Gaw Da Tara gaw, myen hpyen dap a jahtum na shingla ninghkap (last defense line) hku tawn da ai re.

(ii) Sut Masa hte asuya hkrang lam
Myen Hpyen Dap gaw, lapran (ka-ang) shingla ninghkap hku nna, lawu na lam lahkawng hpe tawn da ai re.

a. Munghpawm Myanmar mungdan hta sut masa a 75% hpe hpyen dap kaw nna, jum tek tawn ai re. Dai majaw, ra lata commission a ningbaw U Thin Aye wa, lai wa sai shata 5 daram hta “USA a sut masa pat hkum ai lam tsa ban kade galaw ai rai tim, n tsang ai” ngu nna, media de tsun pru wa ai re. Bai nna, hpyen dap a matu, gumhpraw tam ya ai, cronies law law mung nga ai re. Ga shadawn, U Tay Za (Htoo Foundation and Airpagan), U Htay Myint (Yuzana Company), Zaykaba Khin Shwe, U Zaw Zaw (Ayeyawaddy bank) zawn re ai.

b. Myen mung a asuya hkrang (magam dap/makan dap, hkringmang dap) shagu hta hpyen dap a kam ram ai, masha ni hpe lit ap da nna, tinang lit la da ai shara ni hta lit atsawm la na matu, san tawn da ai re. Mungdan a hkringmang dap (35) ting na, hkringmang ni hpe hpyen dap a myit ra lata san da nna, lit ap shatsam da ai ni hkrai re.

III. USDP mungmasa party hte kaga shalung shala ni
Myen Hpyen Dap gaw, shanhte a ahkang aya (power) ngang kang na matu, USDP (Union Solidarity and Development Party) hpe shawng lam a makawp hkrang (shing n rai) shingla makawp (front defense line) hku nna, tawn da ai re.

Hpyen dap kaw na, ntsa tsang hpyen du ni hpe tara shang pru hkring sa shangun nna, USDP de gawt bang da ai re. Hta sha n-ga, Myen Hpyen Dap hta no. masum tsang kaba dik (joint military chief commanders-Army, Air-force and Navy) ai ni hpe du hkra, Hpyen dap kaw na shapraw kau nna, USDP party de shang shangun ai re.

2010 ning n tara ai, n rap ra ai ra lata poi (unfree and unfair election) hta, USDP party ni hpungdun kaba (landslide victory) hte dang wa nna, hkrang galai asuya hpaw let, ahkang aya (power) hpe jum tek wa sai re. Gaja wa nan, USDP ni htani htana ra lata poi dang wa lu/n lu ngu ai hpe 2012 ni a ka-ang hkap ra lata poi (by-election) hta chyam yu sai re. Dai ra lata poi hta, NLD ni shang lawm shingjawng nna, ra lata ginra yawng ngu na daram dang la ai hpe mu kajawng nu ai. Dai re ai majaw, Myen hpyen dap gaw, USDP hte sha n ram ai, kaga shalung shala (shing n rai) lakung lahkap ni shalaw la ra ai, ngu ai hpe myit mat wa ai re.

Dai majaw, Myen Hpyen Dap gaw, lawu de na shalung shala/lakung lakap ni hpe gyin shalat dai ai re.

a. Ma. Ba. Tha (အမ်ဳိး ဘာသာ သာသနာ ေစာင့္ေရွာက္ေရးအဖြဲ႕)
Hpunggyi ni hpe Ma Ba Tha (မဘသ) ngu ai uhpung uhpawng gyin shalat nna, USDP ni hte pawng hpawm nna, shanhte hpe makawp maga na, ngu ai re. Ya ndai Ma. Ba. Tha hpung ni gaw, mungkan e n nga yu ai, hkungran makawp tara (marriage protection law) ni hpe jahkrat shangun wa ai re.

Ya ra lata poi du hkyen wa magang, Ma. Ba. Tha  ni USDP hpe sha madi shadaw ai lam, kaga mung masa party – NLD, ni hpe jahpyak wa magang, Gumsan Magam Thein Seing hte USDP hpe sha, madi shadaw ai lam ni, matut manoi tsun pru wa ai re.
    
b. Lakung lakap party (proxy party)
Myen Hpyen Dap gaw, USDP hpe madi shadaw na hte ra lata poi ngut ai hpang, asuya hpaw wa ai shaloi, shanhte lata san da ai masha wa, gumsan magam (president) byin wa na matu, vote jaw na matu, lakung lakap party (proxy party) ni hpe gyin shalat wa sai re. Ga shadawn, Dr. Nay Zin Latt (Advisor of President) gaw, အမ်ဳိးသားတိုးတက္ေရးပါတီ ngu ai, party hpe hpaw wa sai re.

Ndai lakung lakap party ni hpe, asuya kaw nna, ja gumhpraw arang, kaga ahkaw ahkang ni jaw nna, hpaw tawn da ya ai party ni re. Dai party ni gaw, ra lata poi (election) n du shi yang, asuya hpe grai dinglun ai zawn nga nna, mung shawa ni e, masu hkalem nhtawm vote lu hkra galaw n htawm, ra lata poi ngut nna, dang wa ai hpang parliament (rap daw) du wa ai shaloi, USDP hpe vote jaw na matu re.

c. Pawng hpawn mai ai bawsang party ni (Co-opted ethnic parties)
Myen Hpyen Dap gaw, bawsang party ni hpe ahkaw ahkang jaw nna, USDP hpe n-gun shajat madi shadaw ya na matu, hkalem da ai re. Hta sha n-ga, ndai party ni gaw, gaja wa nan shakut shaja taw nga ai, amyu sha party ni hpe n-gun shayawm ya ai ladat mung, galaw ya nga ai.

Anhte Wunpawng Amyu sha ni hta mung, USDP (shing n rai) asuya hte pawng hpawn mai ai, party ni law law nga wa sai re.

d. Jarit Sin Dap (shing n rai) mungchying hpyen hpung (BGF or Militias)
Myen Hpyen Dap gaw, shanhte a ahkang aya (power) grin nga lu na matu, Jarit Sin Dap (or) Mungchying hpyen hpung ni hpe atsawm bau tawn da ai re.
Dai hpyen hpung ni gaw, shanhte up hkang nga ai ginra ni hta USDP hpe vote jaw na matu (shing n rai) USDP a lakung lakap hpe vote jaw na matu, (shing n rai) ninghkap party (opposition parties) ni hpe dingbai dingna jaw, ninghkap na matu, lam amyu myu hte mung shawa hpe lam shadam taw nga na matu, san da ai re.
Ga shadawn, lai wa sai laman sha, Slg Zahkung Ting Ying wa gaw, Pangwa ginra (BGF) hta kaga ninghkap party (Opposition parties) – NLD, KSDP etc ni hpe ra lata campaign galaw na matu, pat hkum ai lam ni, galaw wa sai re.

Ginchyum
Dai ni Myen Hpyen Dap gaw, shanhte a ahkang aya (power) ngang grin nga lu na matu, lahta e sawk tang madun da ai lam yan ni hpe gyin shalat da sai re. Dai re ai majaw, anhte myu sha ni, ndai Myen Hpyen Dap a shingla ninghkap (defense lines) ni hpe gara ladat hte adawt sa wa na, galoi aten adawt na, kadai ni hte pawng hpawm nna adawt na, ngu ai hpe mahtai tam let, jawm shakut sa wa ga, ngu tang madun dat ai.

Joe Kumbun

Laika Ngau

July 2017
Mo Tu We Th Fr Sa Su
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

fbook youtube fliker