KADAI AWNGDANG SAI?

2015 November (8) ya shani galaw ai ralata poi kaw NLD party awngdang wa ai hpe mungkan ting kaw na kabu gara jawm tau la masai. Kaja sha nga yang mungdan langai hte langai a ra sharawng ai lam n bung timung pru wa ai mahtai gaw hpyen asuya hta lai nna yawng e jawm ra sharawng ai lam rai wa sai.

NLD party a ra sharawng ai gaw, matse htum ai hpyen asuya hpe agrawp kau nna rapra ai tara hte democracy hkrang hku uphkang na matu rai nna, hpyen asuya yaw shada ai gaw shawng de uphkang wa ai daru magam hpe matut tek jum mat wa na matu re. Rawtmalan hpung law malawng gaw federal hkrang hte uphkang ai ahkaw ahkang hpe lu wa na matu rai nna, anhte Kachin myusha ni gaw awmdawm ahkaw ahkang lu ai pandung rai nga ai. Sinna masha ni gaw Miwa hpe Myenmung kaw na htawk shapraw kau lu na matu rai nna, Miwa gaw Myenmung kaw bang tawn ai arang hpe matut makawp maga tawn lu nna amyat shu la nga lu na matu re. Ndai ningmu ni yawng gaw ladat jaw yang tatut kaw kaja nan awngdang wa mai ai ni hkrai rai nna, pru wa ai mahtai mung ladat kaw madung rai wa sai.

Byin pru wa ai mahtai rai jang ralata shingjawng poi kaw awngdang wa ai Suu Kyi gaw hpyendap n lawm ai sha mungdan uphkang na matu n-gun n lu ai. Hpyendap rai jang shi hkrai matut up sha lu na matu rai nga ai. Sinna masha ni gaw tau nna jahtuk tawn magang sai hte maren, ndai hkinjang kaw du jang NLD hte hpyendap hpe pawng nna asuya hpaw shangun na matu mahkrun tam ya magang sai. Dai shaloi UNFC gaw masa amyu myu hta hkan nna asuya nnan woi awn ai hkrang hpe jawm madi shadaw wa na masa nga ai. Pru wa ai mahtai gaw, nsam n bung ai bum nga masha myu 7 hte Myen myu 1  hpe pawng nna shabyawng dat ai shaloi pru wa ai nsam gaw myu langai (Myen) sha rai wa na re.

Jiwoi Jiwa ni gaw ri nhtu hte htunghpau sha lang nna tinang a mungdan hpe majen je la wa masai. Dai ni na rawtjat ai prat hta n law htum lu nga sai mungdan hpe sha pyi gaw makawp maga da lu ra saga ai. Kaja sha nga yang shinggyim masha kadai raitimung, tinang a rusai amying shingteng hte amyu htunghking ni hpe gaw kaga amyu de byawng shang mat wa na hpe tsepkawp n ra sharawng ai ni hkrai re. Raitimung tau nna mu chye nga ninglen aten dep makawp maga la na kaw ningra mat ai majaw mungkan myusha ni amyu hkying mun lam kaga masha chyasam amyu maga de byawng shang mat wa masai. Dai zawn re ai manghkang kaba gaw daini na ten hta anhte a man kaw nan du nga sai. Tinang a amyu gaw kaga chyasam amyu kata de byawng shang ai kaw na lawt wa lu hkra mahkrun jawm tam let tawkhprut daw dan nhtawm ahkyak jawm la ra saga ai. Ladat shaw dawdan ai kaw masan sa na matu nju ndawng pawt singdawng ai myit jasat hte hkam la lam hpe koi yen kau lu ai ladat gaw awngdang wa lu na matu htaphtuk ai npawt nhpang rai wa na re.

Tsawra kamhpa ai Nu Wa Hpu Nau ni e, awmdawm ahkaw ahkang lu wa na matu lam langai naw nga na re. Karai Kasang jaw da ya ai machye machyang hpe tup hkrak manoi manat nhtawm ladat shaw ahkyak jawm la ai marang e, anhte yawng yaw shada nga ai pandung de teng teng du wa lu na ga ai law.

JJ Lum Dau

Laika Ngau

July 2017
Mo Tu We Th Fr Sa Su
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

fbook youtube fliker