JINGHPAW KASA A NINGMU

Hkawp Hkungga ai Myusha ningbaw ningla ni hte, Pat Jasan magam gun nga ai ningbaw ni hpang de,

Jinghpaw mung kata Pat Jasan Magam bungli hpe galaw hpang wa ai kaw na daini du hkra Awng dang ai lam law law lu la Sai hpe mu mada ai majaw Myusha ni yawng hte rau kabu n gun lu nngai. Pat Jasan magam bungli hta woi awn nga ai ni, shang lawm magam gun ap nawng Nga ai ni yawng hpe mung na chying Chyeju dum nngai.

Rai yang, ndai laman BGF up hkang ginra de Pat Jasan magam bungli galaw sa wa ai shaloi, Pat Jasan ni a hkrun lam hpe hkum pat ai, Pat Jasan ni hpe ninghkap gasat ai lam ni nga wa sai hte maren, hkala n ba hkrum sai Pat Jasan ni mung law law wa ya ten Myitkyina tsi rung hta tsi tsi hkam la Nga ai lam hpe na chye lu ai.

Ndai zawn Pat Jasan ni hpe hkap ninghkap gasat ai majaw mung shawa masha law law, ya ten Myitkyina na n gun madun ninghkap ai lam hpe mung galaw nga sai lam chye lu ai. Ndai zawn ninghkap n gun madun ai lam hta LADAT jaw ra ai ngu mu mada ai. Ya ten ninghkap n gun madun ai Myusha ni gaw Zahkung Ting Ying hpe Hpyen madung hku myit la le, shi hte Shi a BGF hpe ninghkap ai lam galaw nga ai.

Kaja nga yang anhte a hpyen madung gaw myen hpyen wa she re hpe dum ra ga ai. Madung gaw myen hpyen wa hpe ninghkap ra ga ai. Zahkung Ting Ying wa hpe Sha mara mu nna ninghkap taw ai rai yang Mungkan kaw na mung anhte Myusha ni shada byin ai manghkang hku nna mu la mat na re. Hpyen madung gaw myen re hpe Mungkan de Htawng madun ra ga ai. Myen hpyen asuya a majaw ya na zawn byin wa ai re lam hpe madung hku Htawng madun ra ga ai.

Zahkung Ting Ying a Nta shawng Kaw sa n gun madun ninghkap na malai, myen balik dap, hpyen dap, myen asuya rung shawng hkan sa nna n gun madun ninghkap ai lam galaw yang grau tang du na re ngu mu mada ai. Kaja wa mung myen hpyen ni shingdu kawn bungli galaw ai majaw n Dai zawn re lam ni byin pru wa ai rai nga ai.

Ya ten Mungkan Kaw na Jinghpaw mung a lam, Pat Jasan ni a lam hpe grai azi yu taw nga ma ai, dai majaw anhte Myusha shada byin ai manghkang hku Mungkan Kaw na n mu hkra galaw ra ga ai. Anhte Myusha lapran byin ai manghkang re ngu Mungkan kaw na mu kau jang anhte hpe yu azi taw ai myi ni gayin mat wa na hpe tsang ra ai.
Myen hpyen wa mung Mungkan Kaw na yu azi taw ai hpe gayin ma hkra ya na zawn Myusha kata byin ai manghkang hku galaw taw nga ai re lam hpe dum ra ga ai.

Dai majaw Wunpawng Myusha ni a Hpyen madung hpe mahtang madung da jawm ninghkap sa wa ga ngu Ngai a mu mada ai lam hpe tang madun dat lu nngai.

Myusha Lawt Lam Hta,

Jinghpaw Kasa

fbook youtube fliker