PANDUNG DE KADAI WOI DU NA

Anhte Wunpawng Myusha ni a Jiwoi Jiwa ni gaw shan hpyi laika ju sha kau timung nachying magrau grang ai ni rai nna, shumashi shumasha ni a matu mungdan gawgap da ya wa masai. Htawm e, anhte a mungdan hpe tai hpyen wa  kashun la kau ya ai majaw anhte a hpuba hpushawng ni gaw tinang a mungdan hpe bai zing shabai la lu na matu ninggam langai a hpang langai rawtmalan hpang wa masai rai yang, yawshada tawn ai pandung de dai ni du hkra rai n du lu ga ai.

Shawng nnan Du Kaba Lahpai Naw Seng gaw 1949 February 13 ya shani Toungoo makau na Yetashe kaw hpang hkan masha 400 grup yin hte rawtmalan woi hpang wa sai. Dai hpang Du Kaba Lahtaw Zau Seng gaw KIO ngu ai rawtmalan hpung hpe Lashio makau Pang Shau mare kaw woi hpang dat sai. Matut nna Du Kaba Zahkung Ting Ying (NDA-K), Du Kaba Mahtu Naw (KDA), Du Kaba Lasang Awng Wa ni gaw KIO kaw na garan pru nhtawm myusha ni awmdawm ahkaw ahkang lu wa na matu laksan rawtmalan hpung ni hpaw wa masai. Ndai rawtmalan hpung ni yawng gaw tinang a mungdan kata kaw na hpaw shalat dat ai rawtmalan hpung ni hkrai rai wa sai. Tai wa gaw dai rawtmalan hpung ni yawng hpe masawp dep ai hkrai rai nga ai majaw tai wa a matu gaw rawtmalan hpung ni hpe hpyenmasa ginsup chyai na gatlawk shatai wa sai. Shing rai rawtmalan hpung ni gaw tai wa hpe jawm gasat na malai, tai wa shalat ya ai ladat hte myusha shada mahtang dingtawk ladat hte gawai ai ladat lang nna ninghkap hkat wa sai.
Kade rai nna ai laman maigan mungdan kaw nga kaba wa ai Myutsaw Mungtsaw Salang langai gaw lahta kaw tang madun tawn ai rawtmalan hpung ni a ntsa hkut hkut nai nai myit sumru yu wa nu ai. Dai hpang mungdan kata kaw grin nga sai rawtmalan hpung ni a npawt nhpang hpe aten galu la nna hkaja yu ai hpang grup yin hte htaphtuk dum ai rawtmalan hpung hpe maigan mungdan kaw hpaw shabawn dat sai lam shiga brawng wa sai. Kalang ta myit kaw pru wa ai ga san ni gaw, mungdan kata kaw grin nga sai rawtmalan hpung ni hpe ninghkap ai rawtmalan hpung rai kun? Myusha ni a laili laika htunghking hpe ninghkap ai rai kun? Tai wa hpe madi shadaw ai rai na kun? ngu ai re.

Sawk sagawn la lu ai shiga gaw, grin nga sai rawtmalan hpung ni hpe ninghkap na matu n re. Dai grin nga magang sai rawtmalan hpung ni yawng gaw, anhte myusha ni hpe tai wa gara hku shalau roirip wa ai lam mu chye sai rai nna, myusha ni a pandung de lahkam du lu na matu yi-ngam jut langai kaw shang lawm na matu Israel myusha ni kaw na kasi yu la ai re. Dai ni na ten hta anhte a myusha ni gaw maisau pa kaw ka ai laika lu wa saga ai. Ahkyak htum gaw Yehowa Karai Kasang hkangda ya ai Ja Chyum mungga ni mung chye la lu saga ai hta n-ga, damlada ai mungkan hpaji ni mung chye wa nga saga ai. Dai majaw byin mat wa sai mabyin masa ni yawng gaw mai kaja ai lam ni mu chye wa hkra matsaw lahta tang kaw na lam madun la ai rai na sai ngu myit dum dat ai. Dai shaloi, shada ntsa chye na hkat wa nna kahkyin gumdin ai atsam marai myit hpe shatsaw la lu ai marang e, shada ninghkap hkat nga na malai, rawtmalan hpung ni yawng gaw awngdang na mahkrun mu wa shajang na masai ngu hkam la ai. Shing rai myusha lam yan hta byin mai ai shara kaw shang tsap lawm ai hku nna, dephkap ai myutsaw manang ni hte maigan mungdan kaw rawtmalan hpung nnan hpaw shalat dat ai re, nga ai.

Dai Myutsaw Mungtsaw Salang wa a shingdu lam hkaja yu ai shaloi, shi a kawa gaw Sara Kaba Maran Lamau Shan rai nna,  Kutkai Chyumjawng kaw na laram ningtawn ai jawngma madang hku hkaja la wa sai. Shing rai Karai Kasang a mungdan maden zinghka wa lu na matu Kutkai Ginwang Hkalup hpung kaw na Missionary bungli hta shi hpe Miwa mungdan de majen je sa na matu 1947 ning kaw lit kaba shatsam dat ma ai lam na chye lu ai. Shi a kasha Salang Maran Nan Kyin gaw Miwa mung kaw shangai chyinghkai wa ai hte maren, Miwa mung na dakkasu jawng kaw na mungdan uphkang ai tara hpaji ninghkring hku sharin la wa lu sai. Maga mi de tinang myusha ni a htunghking hte laili laika chyoichye hkra sharin la ai zawn, myusha a ntsa myitkap myitdun ai wa mung rai nna Ningbaw Kaba Maran Brang Seng hpe dangdi dangdep ai atsam hte garum shingtau wa ai lam hte maigan mungdan kaw rawtmalan hpung nnan hpaw shabawn ai kaw Salang langai hku shang lawm ai lam na chye lu ai.
 
MARAM AI NINGMU
Mungdan kata kaw hpang wa ai rawtmalan hpung ni a ntsa maram yu ai shaloi, hpung langai a kata kaw ndum shamyi dumbru dumbra byin shangun nna shada gasat shangun ai lam, hpung langai hte langai gasat hkat na matu mahkrun shalat ya ai lam, rawtmalan hpung ni, mungmasha ni hte maigan masha ni a lapran kaw manghkang amyu myu shalat ya ai lam, dai ni na ten hta byin nga ai lungseng maw manghkang, nang hpam pat jasan manghkang zawn re ai ni hpe ra yang ra ai hku galaw lu na matu tai hpyen wa kaw na aten shagu dephkap nga malu ai. Shing rai, rawtmalan hpung ni, mungmasha ni hte maigan masha ni a matu maroi nni, masin gaw nsi, tai wa roirip ai hpe hkamsha wa saga ai. Raitimung, maigan mungdan kaw hpaw shabawn dat ai rawtmalan hpung hpe seng ang ai mungdan a tara hte makawp maga da ya ai rai nna, tai wa a matu dingtawk sa jahten lu na n rai nga ai.

Lai wa sai ten ni hta anhte a myusha ni gaw rawtmalan hpung langai a hpang langai hpaw jat wa saga ai. Raitimung dai lawhtam wa ai n-gun gaw, tai hpyen wa a matu lagaw lata shalaw ya ai lachyum de shanang wa sai. Kade a mara rai kun, ngu ai hpe myit sumru yu ai shaloi, anhte myusha ni yawng (rawtmalan hpung ni a Kanu Kawa ni rai nga ai shawa masha ni hte rawtmalan hpung ni yawng) a ningra ai lam rai nga ai hpe myit dum wa ai. Ja Chyum mungga a matsun maroi hta, "tinang shut ai hpe yin la nna gram sharai la u" nga ai. Dai matsun maroi hpe madat mara ai ni gaw rawtjat ai myusha ni byin tai wa masai. Tinang naw kaji nga yang salang langai gaw, tinang hkam la ai lam kade angawk nna kade shut ai hpe madi madun let gram la na matu tsun wa yu sai. Chyeju dum na malai, tinang kaba jang dai salang hpe kaning di kau na lam myit ga-un wa yu sai. Kaba wa ai shaloi myit malai lu nna dai salang wa hpe chyeju dum ai lam ga hkaw mi sha pyi tsun na matu shi hpe hkan tam yu yang, shi a lupwa hpe sha sa mu lu ai. Dai shaloi, myit malai lu ai shani gaw hpang hkrat mat sai lam dum wa ai re.

Dai ni na ten hta anhte Myusha ni mung Karai Kasang a chyeju marang e, dumhprang chye chyang ai amyu ni byin tai wa lu magang sai. Lapu zawn zai rawng nna, hkru du zawn shingdi nga na hpe madung tawn ra na ten du sai lam Nu Wa Hpu Nau Ji nban yawng hte dum shajang let shadik shatup sa wa nga na masai lam kam dat ai rai.

JJ Lum Dau

Laika Ngau

October 2017
Mo Tu We Th Fr Sa Su
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

fbook youtube fliker