Jinghpaw Mung Shiga

DUNG (34) DE MYEN BYUHAMU LANGAI HKRAT

Wunpawng Mungdan Shanglawt Asuya Kachin Sub-State KIA Dap Ba (4) npu, Dap Dung (34) ginra, Mungmyit Ginwang, Man Yawn kawn lung wa ai myen tai hpyen tatma (33) hpyen hpung ni hpe January (26) ya shani hkying (11:30) ten ram hta KIA Dap Dung (34) na Myu Tsaw Share ninghkring ni hkap shingla ai majaw gasat poi byin lai wa sai lam shiga na chye lu ai. Ndai majan hta myen hpyen de na byuhamhu langai si ai lam na chye lu ai.

Add a comment

SI YAN MARE KAW GASAT

Wunpawng Mungdan Shanglawt Asuya Sinna Ginwang KIA Dap Ba (2) Up Hkang Ginra, Dap Dung (6) kata Kung (1) na Myu Tsaw Share Ninghkring ni hte tatyinmhu Aung Moe woi awn ai hpyen dap (261) ni Kamaing-Hpant lam Sin Yan Mare, myen gawngu makau lambraw kaw January (24) ya jahpawt hkying (8:15) ten gap gasat lai wa sai lam shiga na chye lu ai. Myen tai hpyen ni maga na (3) si hkrum lai wa sai lam mung na chye lu ai. Majan gaw ya ten du hkra matut gasat nga ai lam chye lu ai.

Add a comment

GIDON POST DE HPYEN NBUNGLI NI HTE WA GASAT

Wunpawng Mungdang Shanglawt Asuya Up Hkang Ginra, KIA Dap Nawng Dap Dung (252) ni a ginra rai nga ai Gidon Post de myen hpyen asuya ni kawn n gun kaba hte laja lana htu gasat taw nga ai gaw shata mi jan na wa sai lam hpe na chye lu ai. Myen tai hpyen ni kawn Gidon Post de hpyen n-gun, laknak n-gun ni shata mi jan htu gasat ai rai tim KIA Myu Tsaw Share Ninghkring ni kawn ja ja ninghkap gasat nga ai majaw myen tai hpyen ni a matu sum kaba rai wa ai sha n-ga, si hkala ai hpyen la ni tsa lam shadang rai wa ai majaw dai ni October (7) ya jahpawt hkying (9:10) ten ram kawn myen tai hpyen ni kawn hpyen gasat nbungli (4) tup hte wa htim gasat nga ai lam na chye lu ai.

Myen tai hpyen dap a hpyen gasat nbungli ni gaw Myitkyina hte Manmaw hpyen nbungli dap ni kawn numdaw hte numdaw wa htim gap nga ai re lam hpe mung na chye lu ai. Gidon Post hpe makawp maka nga ai KIA Myu Tsaw Share Ninghkring ni a matu Mungkan shara shagu chyam bra nga ai Wunpawng Myusha ni yawng akyu ja ja hpyi garum ya na matu shanglawm kawn garum hpyi saw lajin wa ai lam hpe mung na chye lu ai.
Add a comment

SHANGLAWT ASUYA MAGAM GUN NINGBAW NNAN NI

Wunpawng Mungdan Shanglawt Asuya kata Ningbaw Ningla daw hta magam gun nnan ni hpe bai shatsam lai wa sai lam shiga na chyle lu ai. Magam bungli nnan ni hta bai shatsam hkrum ai Ningbaw Ningla ni gaw-

  1. Ningbaw Kaba Slg. Lanyaw Zawng Hra: Wunpawng Mungdan Shanglawt Hpung Ginjaw Komiti Tingnyang Up, Wunpawng Mungdan Shanglawt Kongsi Ningbaw, Wunpawng Mungdan Shanglawt Hpyen Dap a Dap Up Daju,
  2. Du Daju Jum Nban La:  Wunpawng Mungdan Shanglawt Hpung Ginjaw Komiti Tingngyang Up Malai hte Wunpawng Mungdan Shanglawt Hpyen Dap a Tau Dap Up Daju,
  3. Lat Du Daju Jum Gunhtang Gam Shawng: Wunpawng Mungdan Shanglawt Kongsi Ningbaw malai (I) hte Wunpawng Mungdan Shanglawt Hpyen dap a Dap Awn Daju (CS),
  4. Du Daju Sumlut Gun Maw: Wunpawng Mungdan Shanglawt Kongsi Ningbaw malai (II),
  5. Du Up Daju Wukhkyung Hkawng Lum: Wunpawng Mungdan Shanglawt Hpyen Dap hta Tau Dap Awn Daju (VCS) (I)
  6. Du Up Daju Wanghkang Awng Seng La: Tau Dap Awn Daju (VCS) (II ),
  7. Du Up Daju Maran Zau Tawng: Hpyen Awn Du Up Daju,
  8. Du Up Jum Gawlu La Awng: Wunpawng Mungdan Shanglawt Asuya,Maigan Makyit Mahkai Magam Dap a Lithkam, 

ni re lam hpe chyle lu ai.

 

Add a comment

Page 1 of 124

Jinghpaw Mung Shiga

July 2017
Mo Tu We Th Fr Sa Su
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

fbook youtube fliker